Վարչապետ Նիկոլ Փաշինյանն աշխատանքային այցով Արցախի Հանրապետությունում է: Ստեփանակերտում տեղի է ունեցել ՀՀ վարչապետ Նիկոլ Փաշինյանի և ԱՀ նախագահ Արայիկ Հարությունյանի առանձնազրույցը:

«Մեծարգո պարոն վարչապետ, նախ ուզում եմ շնորհակալություն հայտնել հերթական անգամ Արցախ այցելելու կապակցությամբ: Ցանկանում եմ կիսվել երեկ Սարդարապատում կայացած միջոցառման կապակցությամբ: Երեկ խորհրդանշական օր էր, որովհետև Հայաստանի Հանրապետության առիթով հերոսացման առիթներ շատ ենք ունեցել, բայց ունենալ այնպիսի հաջողություն, որը մենք արձանագրել ենք հուլիսյան օրերին Տավուշում և ծանոթանալով մեր հերոսների սխրագործությանը, ակամայից հիշել եմ 1990-ական թվականները` պատերազմի ժամանակահատվածը: Նշեմ, որ դա մեր հերթական հաղթանակն է անկախության տարիներին: Տպավորված եմ և այսօր ողջ օրվա ընթացքում շփումների ժամանակ կիսել եմ այն ապրումները, որոնք ունեցել եմ: Ցանկանում եմ բոլորիս շնորհավորել երեկվա կապակցությամբ: Դա հերթական ապացույցն է, որ մեր ընտրած ճանապարհը ճիշտ է:

Կրկին ցանկանում եմ ողջունել Ձեզ Արցախի Հանրապետությունում: Մենք նախանշել ենք ոչ միայն այցելություն Զինված ուժեր, առաջնագիծ, նաև տնտեսական խոշոր որոշ նախագծեր, որոնք համակարգաստեղծ նշանակություն ունեն ոչ միայն Արցախի տնտեսության, այլ նաև մեծ նշանակություն են ունենալու մեր ընդհանուր Հայաստան աշխարհի, Հայաստանի Հանրապետության տնտեսության համար: Բարով եք եկել»,-ասել է Արայիկ Հարությունյանը:

«Մեծարգո պարոն նախագահ, ուրախ եմ մեր հերթական հանդիպման համար: Սա Ձեր երդմնակալության արարողությունից հետո առաջին այցն է Արցախի Հանրապետություն: Իհարկե, մենք մի շարք այցելություններ կունենանք, նաև առիթ կունենանք քննարկելու տարածաշրջանում տեղի ունեցող պրոցեսները: Ցավոք, ռազմաքաղաքական իրավիճակը մեր տարածաշրջանում շարունակում է մնալ լարված, ականատես ենք լինում սադրիչ գործողությունների, բայց մյուս կողմից մեր մարտավարությունը և ռազմավարությունը և մեր փոխգործակցության, և մեր զարգացման ռազմավարությունը չի փոխվում, որովհետև այդ սադրանքները, որոնք տեղի են ունեցել և տեղի են ունենում, մեզ համար կանխատեսելի են: Մենք բազմիցս քննարկել ենք հնարավոր պարամետրերը: Իհարկե, մենք համատեղ շատ մեծ օրակարգ ունենք սկսած Հայաստանի զինված ուժերի և Արցախի պաշտպանության բանակի բնականոն զարգացումից: Իհարկե, մենք նաև որոշակի պարտավորություններ ենք ստանձնել Արցախում տնտեսության, էներգետիկ ոլորտում ունենք բավականին լայն օրակարգ: Ցավոք, նոր տիպի կորոնավիրուսի համավարակը որոշակիորեն փոխեց տնտեսական տրամադրությունը, և մենք պետք է ավելի շատ ջանք գործադրենք, որպեսզի տնտեսական տրամադրությունը ոչ միայն վերադարձնենք նախահամավարակային շրջանին, այլև շատ ավելի բարձր նոտաներ հաղորդենք:

Համաձայն եմ, երեկվա միջոցառումը շատ կարևոր էր և ուրախ եմ, որ Ստեփանակերտում էլ համանման մի արարողություն ենք ունենալու, ինչը շատ կարևոր է: Կարծում եմ, նման միջոցառումները, նման որոշումները մեծացնում են մեր ազգային համախմբվածության մակարդակը և մեզ նոր ուժ ու լիցք են տալիս, որովհետև մեր կենդանի հերոսները, մեր նահատակները, իհարկե, այն ուղենիշն են, որոնց երազանքների և նպատակադրումների իրագործումը մեզ համար պիտի դառնա ամենօրյա խնդիր: Իհարկե, մենք պետք է հասկանանք, որ դա մեկ գործողությամբ չէ տեղի ունենալու, պարզապես մենք պետք է լինենք հետևողական»,-նշել է Նիկոլ Փաշինյանը:

«Մի քանի նախադասությամբ կցանկանայի ներկայացնել տնտեսական իրավիճակը. անմիջական Ձեր ղեկավարությամբ Հայաստանի Հանրապետության կառավարության ստեղծած հնարավորությունը թույլ է տալու տարին փորձել ամփոփել առանց անկման: Սա մեզ համար կլինի լուրջ հաջողություն, իսկ մյուս տարի կնախատեսենք երկնիշ աճի տեմպ` հիմքում ունենալով այն ծրագրերը, որոնք այսօր սկսել ենք կյանքի կոչել: Դրանք ուղղված են ենթակառուցվածքների զարգացմանը, լայնածավալ ճանապարհաշինությանը, ոռոգման համակարգերի կառուցմանը: Արդեն սկսված է մեր ամենախոշոր ծրագիրը` ոռոգման համակարգերի արդիականացման ու զարգացման, որոնք նախատեսում ենք ավարտել մեկուկես տարում: Այս փուլում նախատեսում ենք 35 հազար հեկտար ոռոգելու հնարավորություն, ինչը ոչ միայն տնտեսական ցուցանիշներն է կարգավորելու, այլ նաև ինչպես քննարկել ենք անվտանգության խորհուրդների համատեղ նիստին մեր ընդհանուր հայրենիքի պարենային անվտանգության խնդիրներն ենք լուծելու:

Իհարկե, սրանով չենք սահմանափակվելու, վերամշակման, մանավանդ սննդի արդյունաբերության առումով ունենք նախանշված ուղղություններ: Ընդհանուր առմամբ, սննդի վերամշակման ոլորտը լինելու է մեր գլխավոր ուղղություններից մեկը, և արդեն այսօր նոր հնարավորություններ ենք փնտրում նոր շուկաներ մուտք գործելու նպատակով:

Կրկին ցանկանում եմ շնորհակալություն հայտնել մեր ամենօրյա օպերատիվ համագործակցության, կառավարության ստորաբաժանումների օպերատիվ արձագանքման, հնարավորության դեպքում մեր բարձրացրած խնդիրներին աջակցություն ցուցաբերելու համար: Դա մեզ համար ամենագլխավորն է»,-նշել է Արցախի Հանրապետության նախագահը:

* * *

Վարչապետ Նիկոլ Փաշինյանը տիկնոջ` Աննա Հակոբյանի հետ Ստեփանակերտում ներկա է գտնվել Արցախի Հանրապետության բարձրագույն պարգևներ հանձնելու հանդիսավոր արարողությանը: Միջոցառմանը ներկա են եղել Արցախի Հանրապետության նախագահ Արայիկ Հարությունյանը` տիկնոջ հետ, Արցախի հոգևոր թեմի առաջնորդ Պարգև արքեպիսկոպոս Մարտիրոսյանը, Հայաստանի և Արցախի կառավարությունների ու խորհրդարանների ներկայացուցիչները և այլք:

Միջոցառման ընթացքում Արցախի Հանրապետության նախագահ Արայիկ Հարությունյանը Լեռնային Ղարաբաղի Հանրապետության Գերագույն խորհրդի առաջին նախագահ Արթուր Մկրտչյանին և Արցախի Հանրապետության պաշտպանության բանակի N զորամասի 4-րդ հրաձգային վաշտի հրամանատար, կապիտան Արմենակ Ուրֆանյանին հետմահու «Արցախի հերոս» բարձրագույն կոչում շնորհելու պարգևները` Ոսկե արծիվ շքանշանները հանձնել է Արթուր Մկրտչյանի այրուն և Արմենակ Ուրֆանյանի մայրիկին:

Արցախյան պատերազմի ժամանակ կապի համակարգի արդիականացման, առաջնագծում զինծառայողների անվտանգ ծառայության գործում ունեցած ներդրման, ինչպես նաև ռազմարդյունաբերության բնագավառում ունեցած ծառայությունների համար և Արցախի Հանրապետության հռչակման 29-րդ տարեդարձի կապակցությամբ պահեստազորի ենթասպա Վահրամ Թամրազյանը պարգևատրվել է «Մարտական խաչ» առաջին աստիճանի շքանշանով:

Հայրենիքի պաշտպանության համար մղված մարտերում ցուցաբերած բացառիկ քաջության ու արիության համար և Արցախի Հանրապետության հռչակման 29-րդ տարեդարձի կապակցությամբ Հովսեփ Հովսեփյանը պարգևատրվել է «Մարտական խաչ» առաջին աստիճանի շքանշանով:

Իր խոսքում, վարչապետ Փաշինյանը, մասնավորապես, նշել է.

«Արցախի Հանրապետության մեծարգո նախագահ,
Հարգելի տիկին Հարությունյան,
Գերաշնորհ Տեր,
Մկրտչյան ընտանիքի հարգելի անդամներ,
Ուրֆանյան ընտանիքի հարգելի ներկայացուցիչներ,
Հարգելի պարոն Թամրազյան,
Հարգելի պարոն Հովսեփյան,
Հայաստանի և Արցախի կառավարությունների հարգելի ներկայացուցիչներ,

շատ հուզիչ և կարևոր միջոցառում է: Կարծում եմ, որ վերջինիս ամենակարևոր խորհուրդն այն է, որ մենք մեր պատմությունը չենք մոռանում: Մենք, իհարկե, ամեն օր, ամեն ժամ նայում ենք ապագային, բայց այն ճիշտ կառուցելու համար պետք է ճիշտ գնահատել նաև անցյալը: Շատ խորհրդանշական է, որ այսօր Արցախի հերոսի կոչմամբ պարգևատրվում են մեր ազատամարտի առաջին սերնդի ներկայացուցիչը և մեր ազատամարտի արդեն արդի սերնդի ներկայացուցիչը: Նրանք պարգևատրվում են նույն օրը, նույն տեղում և միևնույն ժամանակ պարգևատրվում են մեր ազատամարտի շատ նշանավոր մասնակիցներ` անցյալի և ներկայի իրենց ծառայությունների համար: Սա իսկապես շատ կարևոր խորհուրդ է:

Կարծում եմ` այսօրվա միջոցառումը ձայնակցում և ներդաշնակվում է երեկ Սարդարապատում տեղի ունեցած միջոցառման հետ: Ընդ որում, մենք ասում ենք, որ Սարդարապատը շատ խորհրդանշական տեղ է մեր ժողովրդի պատմության համար, մեր ազատամարտի պատմության համար, բայց Ստեփանակերտը պակաս խորհրդանշական տեղ չէ: Այստեղ էլ մենք ունենք խորհուրդ. Առաջին Հանրապետության մեր ժամանակների հիմքում դրված իրադարձություն` Սարդարապատ, և Երրորդ Հանրապետության ձևավորման, ազատ Արցախի, անկախ Արցախի ձևավորման ահա այս ամբողջությունը, այս խորհրդանիշը, որը չափազանց կարևոր է:

Ընդհանրապես միտքը, մտայնությունը, ընկալումը շատ կարևոր է: Վերջերս մենք ազգային անվտանգության ռազմավարություն ընդունեցինք և շատ կարևոր համարեցինք այդ ռազմավարության հիմքում որպես նախաբան դնել մեր ակունքների և արժեքների մասին հիշատակում:

Երեկ և այսօր տեղի ունեցած միջոցառումները ես համարում եմ դրա խորհրդանիշը, որ մենք պետք է գնահատենք անցյալի մեր արժեքները, պիտի գնահատենք մեր նորագույն պատմության արժեքները և կարծում եմ, որ, այո, երեկ Հայաստանի ազգային հերոսի կոչում ստացած Ռուբեն Սանամյանը, մեր մյուս պարգևատրվածները խորհրդանիշն են այն բանի, որ մեր առաջին սերնդի ազատամարտիկների, Սարդարապատի հերոսների գործը կենդանի է, կենդանի հենց այս պահին: Այդ մարդիկ երեկ պարգևատրվել են և այսօր գնացել իրենց ծառայությանը: Հայաստանի ազգային հերոսը երեկ պարգևատրվել է, և այսօր կապիտան Սանամյանը կատարում է իր պարտքը հայրենիքի պաշտպանության գործում: Սա նոր խորհրդանիշ է, սա նոր ճանապարհ է, սա նոր ընկալում է, բայց որը փառաբանում, արժևորում է անցյալի մեր հերոսներին:

Ես համոզված եմ, որ այսօր մարտի գնացող և սխրանքներ կատարող մեր տղաները, մեր զինվորները, մեր սպաները, գեներալներն իրենց աչքի առաջ ունեն անցյալի հերոսներին: Սա մի ամբողջական գործ է, մի ամբողջական անելիք և մենք այս գործը պիտի անենք միասին: Այս գործից ամենևին էլ անմասն չեն մեր նահատկները, որովհետև այսօր այս միջոցառմամբ մենք ընդգծում ենք նրանց ներկայությունը այսօր, այստեղ, հիմա, մեր կողքին»:

* * *

Աշխատանքային այցով Արցախի Հանրապետությունում գտնվող վարչապետ Նիկոլ Փաշինյանն ԱՀ նախագահ Արայիկ Հարությունյանի հետ այցելել է «Բեյզ Մեթըլս» ընկերության Կաշենի լեռնահանքային համալիր: Վարչապետն ու ԱՀ նախագահն ընկերության ղեկավարների ուղեկցությամբ շրջայց են կատարել համալիրում, ծանոթացել Կաշենի լեռնահանքային համալիրում իրականացվող աշխատանքներին, ընկերության գործունեությանն ու առաջիկա ծրագրերին:

Նշվել է, որ «Բեյզ Մեթըլս»-ը հանդիսանում է Արցախի ամենախոշոր արտադրական միավորումներից մեկը, որի գործունեության արդյունքում մի շարք ոլորտներում իրականացվում են նաև տարբեր ծրագրեր: Տեղեկացվել է, որ արտադրությունն իրականացվում է բնապահպանական արդի չափանիշներին համապատասխան տեխնիկական սարքավորումներով:

Շրջայցի ավարտին տեղի ունեցած խորհրդակցության ընթացքում ընկերության ղեկավարները մանրամասն անդրադարձ են կատարել հանքանյութի արտադրության գործընթացին և արդյունաբերության ոլորտում ընկերության զարգացման հեռանկարներին:

* * *

Աշխատանքային այցով Արցախի Հանրապետությունում գտնվող վարչապետ Նիկոլ Փաշինյանն Արցախի Հանրապետության նախագահ Արայիկ Հարությունյանի հետ այցելել է Պաշտպանության բանակի շտաբ, որտեղ տեղի է ունեցել ծառայողական խորհրդակցություն: Արցախի պաշտպանության նախարար, ՊԲ հրամանատար, գեներալ-մայոր Ջալալ Հարությունյանը հայկական երկու հանրապետությունների ղեկավարներին զեկուցել է բանակաշինության ընթացիկ խնդիրների մասին:

Խորհրդակցության ընթացքում քննարկվել են Հայաստանի և Արցախի ռազմական համագործակցության հետագա խորացմանը և հակառակորդին զսպելու մեխանիզմների կատարելագործմանը վերաբերող մի շարք հարցեր:

* * *

Վարչապետ Նիկոլ Փաշինյանն Արցախի նախագահ Արայիկ Հարությունյանի հետ այցելել է սահմանապահ դիրքեր: Վարչապետին և նախագահին ուղեկցել են ՀՀ պաշտպանության նախարար Դավիթ Տոնոյանը և ԱՀ պաշտպանության նախարար-պաշտպանության բանակի հրամանատար Ջալալ Հարությունյանը:

Հայկական երկու հանրապետությունների ղեկավարներին ներկայացվել են ինժեներական և ամրաշինական ենթակառուցվածքները, հուսալի պաշտպանություն իրականացնելու նոր տեխնոլոգիաները, նոր սպառազինությունը, դիրքերում անձնակազմի անվտանգության բարձրացմանն ուղղված աշխատանքները, տեխնիկական հագեցվածությունը:

Նիկոլ Փաշինյանը և Արայիկ Հարությունյանը ծանոթացել են զինծառայողների կենցաղային պայմաններին և զրուցել զինվորների հետ:

Այնուհետև նրանք եղել են ՊԲ զորամասերից մեկում, որտեղ ներկա են գտնվել նորակառույց ճաշարանի բացման արարողությանը: Այստեղ ևս ներդրվել է նոր սննդակարգը: Վարչապետը ծանոթացել է զինծառայողներին տրամադրվող սննդի տեսականուն, որակին:

Նիկոլ Փաշինյանն ընդգծել է, որ նոր սննդակարգի ներդրման գործընթացը զինված ուժերում հաջողությամբ շարունակվում է: ՀՀ վարչապետը կարևորել է Զինված ուժերի, ռազմարդյունաբերության շարունակական զարգացումը` հավելելով, որ խնդիրը գտնվում է ՀՀ կառավարության ուշադրության կենտրոնում ու այդ ուղղությամբ աշխատանքներն իրականացվում են հետևողական կերպով: