Վարչապետ Նիկոլ Փաշինյանն այսօր տիկնոջ` Աննա Հակոբյանի հետ այցելել է Գյումրի` Հայաստանի Հանրապետության անկախության 28-ամյակին նվիրված տոնական միջոցառումներին մասնակցելու նպատակով:

Գյումրու Սև բերդում Նիկոլ Փաշինյանը Հայաստանի Հանրապետության նախագահ Արմեն Սարգսյանի, Արցախի Հանրապետության նախագահ Բակո Սահակյանի, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի և Հայաստանի Հանրապետության Ազգային ժողովի նախագահ Արարատ Միրզոյանի հետ ներկա է գտնվել «Մեր ժամանակի հերոսը» խորագրով մրցանակաբաշխությանը, որն անցկացվում է առաջին անգամ: Միջոցառմանը ներկա էին նաև կառավարության անդամներ, ԱԺ պատգամավորներ, ՀՀ մարզպետները, Հայաստանում հավատարմագրված օտարերկրյա պետությունների դիվանագիտական ներկայացուցիչներ և պաշտոնատար այլ անձինք:

Մրցանակները շնորհվել են ՀՀ վարչապետի աշխատակազմի Տեղեկատվության և հանրային կապերի կենտրոնի կողմից պատրաստվող «Մեր ժամանակի հերոսը» հաղորդման 13 մասնակիցներին` թեյի արտադրությամբ զբաղվող Ռիտա Մարտիրոսյանին, պանրագործ Արման Միքայելյանին, բիովառելիքի արտադրությամբ զբաղվող Ստեփան Ավագյանին, ոլտերման Ազատ Թովմասյանին, փայտագործ Սամվել Գասպարյանին, կիսաթանկարժեք քարերի արտադրությամբ զբաղվող Արտակ Բոջիկյանին, թեյի արտադրությամբ զբաղվող Աստղիկ Գալստյանին, կավագործ Ռուբեն Գևորգյանին, ջերմոցային տնտեսությամբ զբաղվող Արտակ Ղարանլղցյանին, կոսմետիկ միջոցների արտադրությամբ զբաղվող Արփինե Բարսեղյանին, գործիքներ պատրաստող Լյուդվիգ Միքայելյանին, ռեստորանային բիզնեսով զբաղվող Վարդա Ավետիսյանին և «Վարդենիս կար» ընկերության տնօրեն Լենա Երանոսյանին: Նրանք մարդիկ են, ովքեր փոխում են իրենց կամ շրջապատի կյանքը, սեփական ուժերով բիզնես են ստեղծում և ապագան կապում Հայաստանի հետ: Մասնակիցներից մեկին` թեյի արտադրությամբ զբաղվող Ռիտա Մարտիրոսյանին, մրցանակ-արձանիկը հանձնել է վարչապետ Նիկոլ Փաշինյանը:

Կառավարության ղեկավարը հանդես է եկել ելույթով, որում, մասնավորապես, նշել է.

«Հայաստանի Հանրապետության մեծարգո նախագահ,
Արցախի Հանրապետության մեծարգո նախագահ,
Վեհափառ Տեր,
Ազգային ժողովի մեծարգո նախագահ,
Կառավարության հարգելի անդամներ,
Ազգային ժողովի պատգամավորներ,
Հյուրեր

Այսօրվա մրցանակաբաշխությունը և իրադարձությունը Հայաստանի և հայ ժողովրդի մասին են: Մենք այսօր հարգանքի և մեծարանքի տուրք ենք մատուցում մեր ժողովրդի տաղանդին, նրա ստեղծարար հզորությանը, սեփական ուժերին հավատալու նրա կարողությանը: Նոր Հայաստանի ամենակարևոր առանձնահատկությունը սա է, որ մենք խնդիր ունենք անընդհատ կերտել նոր հերոսներ: Ընդհանրապես Հայաստանում միշտ եղել է այդ հարցը, թե ով է հերոսը Հայաստանի Հանրապետությունում, ով է այն կերպարը, որին պետք է ձգտեն նմանվել երիտասարդները: Այս հարցը սովորաբար մի պատասխան չի ունենում:

Աներկբա է, որ առաջին և ամենամեծ հերոսները մեր այն զինվորներն են, ովքեր կանգնած են սահմանին և սպաները, մեր զինված ուժերը, մեր գեներալները: Երեկ Հանրապետության նախագահը կոչումներ և մեդալներ շնորհեց մեր բազմաթիվ զինվորականների: Աներկբա է, որ մեր ժամանկների և բոլոր ժամանակների հերոսներ են մեր ժողովրդի արվեստը և մշակույթը ստեղծած մարդիկ: Աներկբա է, որ բոլոր ժամանակների մեր հերոսներն են մեր գիտնականները, մեր բազմաթիվ պետական և քաղաքական գործիչները, բայց Նոր Հայաստանի կերպարն ամբողջացնելու համար հարկավոր է նաև հերսական այդ համայնապատկերի ևս մի կարևոր շտրիխ ավելացնել: Դա աշխատող և արարող մարդու կերպարն է: Դրանք այն մարդիկ են, ովքեր ունեն համարձակություն` տնօրինել իրենց ճակատագիրը: Դրանք այն մարդիկ են, ովքեր ունեն համարձակություն` իրենց ձեռքը վերցնել իրենց և իրենց հայրենիքի ճակատագրի ղեկը: Դրանք այն մարդիկ են, ովքեր չեն սպասում, որ որևէ մեկից որևէ բան ստանան, նրանք այն մարդիկ են, ովքեր պատրաստ են տալ, կիսվել իրենց տաղանդով, իրենց գիտելիքով, իրենց հմտություններով` կառուցելով իրենց ընտանիքի և ուրիշների բարեկեցությունը, հայրենիքի բարեկեցությունը:

Մենք քաղաքական հեղափոխությունն սկսել, իրականացրել և նախապատրաստել ենք մի կարգախոսով` Հայաստանի Հանրապետության բոլոր քաղաքացիներին ասել ենք` Հայաստանի ապագան կախված է մեկ մարդուց, և այդ մեկ մարդը դու ես: Եվ մենք այսօր` տնտեսական հեղափոխության այս շրջանում, նույն ուղերձն ենք հղում ՀՀ բոլոր քաղաքացիներին, որ մեր երկրի բարեկեցությունը, մեր երկրի տնտեսական զարգացվածությունը, նաև մեր բանակի հզորությունը կախված է մեկ մարդուց, և այդ մեկ մարդը մեզնից յուրաքանչյուրն է, որովհետև պետք չէ մոռանալ, որ բանակն ամուր է իր թիկունքով, բանակն ամուր է իր տնտեսությամբ, բանակն ամուր է աշխատանքով, բանակն ամուր է բարեկեցիկ ժողովրդով:

Մեր խնդիրն է, որ Հայաստանի Հանրապետությունը լինի բարեկեցիկ քաղաքացիների երկիր, և լինելու է բարեկեցիկ քաղաքացիների երկիր, որտեղ մարդիկ ունեն բավարար ինքնագնահատական, որտեղ մարդիկ բավարար չափով հավատում են իրենց ուժերին և մարդիկ սեփական ձեռքերով կառուցում են իրենց, իրենց ընտանիքների, իրենց միջավայրի և իրենց հայրենիքի բարեկեցիկ ներկան, և բարեկեցությունը բավարար է արդեն, որ լինի ապագա: Բարեկեցեթյունն արդեն պետք է լինի ներկա, և այս միջոցառումը հենց այդ բարեկեցիկ ներկայի մասին է, որը մենք ոչ թե կերտելու ենք, այլ մենք կերտում ենք և կերտում են մեր ժամանակների հերոսները: Ես ուզում եմ ասել, որ ամենադժվարը 45 հաղթոսղներից 13-ին ընտրելն էր, նրանք բոլորը հավասարաբար մեր ժամանակների հերոսներն են:

Եվ, այո, մենք հարգանքի տուրք ենք տալիս յուրաքանչյուր աշխատող, յուրաքանչյուր ստեղծող մարդու, և ես անձամբ խոնարհվում եմ բոլոր այն մարդկանց առաջ, ովքեր գիտեն, որ Հայաստանի ապագան կախված է մեկ մարդուց, և այդ մեկ մարդը իրենք են, և իրենք պատրաստ են աշխատել և աշխատում են հանուն այդ ապագայի:

Հիմա ես կազդարարեմ մրցանակակրի անունը: Անկեղծ ասած, սա անվանել ենք գլխավոր մրցանակ և այդ գլխավոր մրցանակակիրը, իմ կարծիքով, հավաքական կերպարն է այդ բոլոր ժամանակների հերոսների: Նա մի մարդ է, ով իր կյանքում հեղափոխություն անելու որոշում է կայացրել` քաղաքից տեղափոխվել է գյուղ: Այստեղ կրկին այդպիսի մասնակիցներ ունեինք: Նա մի մարդ է, ով լինելով ընտանիքի մայր, չի համարել, որ ինքն անելիք չունի, որ ինքը չի կարող ձեռնարկատիրությամբ զբաղվել: Նա հավատացել է իր ուժերին, և ստեղծել է ձեռնարկություն: Այս մրցանակը նաև այն ընտանիքներին է պատկանում, այն ամուսիններին, այն որդիներին, ովքեր չեն սահմանափակում իրենց կանանց կամ մայրերի ինքնադրսևորվելու հնարավորությունը, և այս մրցանակը նաև մրցանակակրի ընտանիքին է պատկանում: Այս մրցանակը նաև խորհրդանշում է մեր ժողովրդի, մեր ազգի ստեղծարար հավաքական կերպարը, և այդ մրցանակակրի անունն է Ռիտա Մարտիրոսյան»:

Այնուհետև բեմ են բարձրացել «Մեր ժամանակի հերոսը» շարքի բոլոր մասնակիցները: Դիմելով նրանց` Նիկոլ Փաշինյանը նշել է.

«Որպես ՀՀ վարչապետ` շնորհակալություն եմ հայտնում ձեր կատարած աշխատանքի համար, շնորհակալություն եմ հայտնում ձեզ, որ դուք հավատում եք ձեր ուժերին, ես ձեզ շնորհակալություն եմ հայտնում, որ դուք աշխատանքը համարում եք ձեր, մեր երկրի խնդիրների լուծման ճանապարհը: Այստեղ իհարկե, ոչ բոլորին, բայց շատերին ես հյուրընկալել եմ և տեսել եմ նրանց իրենց աշխատանքի մեջ, իրենց առօրյայի մեջ, և իսկապես այս մարդկանց գոյությունը Հայաստանի Հանրապետությունում ուզում եմ արձանագրել, որ մեծացնում է իմ վստտահությունը` որպես Հայաստանի Հանրապետության վարչապետ, որ մենք կլուծենք բոլոր այն խնդիրները, որ մեր առաջ դրված են:

Ընդհանրապաես Հայաստանի Հանրապետության տարբեր փուլերում երբեք լավատեսական կանխատեսումներ չեն եղել: Հոռետեսությունը եղել է Հայաստանի հիմնական կանխատեսումը, բայց այս մարդկանց գոյությունն իմ խորին համզոմամբ, արձանագրում է մի երևույթ, մի փաստ: Իմիջիայլոց, նրանցից շատերը սկսել են աշխատել 2000, 2003, 2004, 2005 թվականից, վերջին 15 տարում, և այս մարդիկ իմ կարծիքով իրենց աշխատանքով կաթիլ առ կաթիլ կերտել են լավատեսության հաղթանակը Հայաստանի Հանրապետությունում: Եվ ես ձեզ շնորհակալություն եմ հայտնում հայ ժողովդրի շրջանում, Հայաստանի Հանրապետությունում լավատեսության հաղթանակի համար: Դուք հաղթել եք, դուք մեր ժամանակների հերոսներն եք»:

* * *

Վարչապետ Նիկոլ Փաշինյանը Հայաստանի Հանրապետության անկախության 28-րդ տարեդարձի առթիվ հրավիրել է տոնական ընդունելություն, որը տեղի է ունեցել Գյումրիում: Հանրապետության վարչապետն ընդունելության ժամանակ շնորհավորական ուղերձ է հղել Անկախության տոնի կապակցությամբ:

«Հայաստանի Հանրապետության մեծարգո նախագահ,
Արցախի Հանրապետության մեծարգո նախագահ,
Վեհափառ Տեր,
Ազգային Ժողովի մեծարգո նախագահ,
Կառավարության հարգելի անդամներ,
օտարերկրյա դիվանագետներ,
պետական այրեր, հարգելի հյուրեր,

Այսօր սեպտեմբերի 21-ն է, մեր ժողովրդի պատմության ամենակարևոր օրերից մեկը, ամենամեծ տոներից մեկը, երբ 1991 թվականի սեպտեմբերի 21-ին տեղի ունեցավ Հայաստանի Անկախության հանրաքվեն և Հայաստանի բնակչության 98 տոկոսը քվեարկեց անկախության օգտին:

Դա մի գործընթաց էր, որ 1991 թվականի սեպտեմբերի 21-ին հասավ իր կուլմինացիային: Այդ գործընթացը սկսել էր 1988 թվականին` Ղարաբաղյան շարժմամբ, երբ մեր ժողովուրդը Հայաստանի Հանրապետությունում և Արցախում բարձրաձայնեց ազատ, միասնական և հզոր լինելու իր կամքը: 1991 թվականի սեպտեմբերի 21-ից առաջ, 1990 թվականի օգոստոսի 23-ին ընդունվել էր Հայաստանի Անկախության հռչակագիրը և այդպիսով նաև դե յուրե հայ ժողովուրդն իր ընթացքն էր սկսել դեպի անկախություն:

Անկախությունից, միջազգային իրավունքի սուբյեկտ ճանաչվելուց անմիջապես հետո մեր ժողովուրդը, Հայաստանի Հանրապետությունը և Արցախը կանգնեցին մեծ փորձությունների առաջ: Ըստ էության, դեռևս մի քանի տարի առաջ սկսած կոնֆլիկտը վերաճեց մի լիարժեք պատերազմի, որում հայ ժողովուրդը միասնության, կամքի շնորհիվ կարողացավ հաղթանակ տանել: Այդ հաղթանակը բերեցին առաջին հերթին այն ազատամարտիկները, ովքեր կամավոր զինվորագրվեցին հայրենիքի պաշտպանության գործին: Նրանք պատվով կատարեցին իրենց առաքելությունը և թույլ չտվեցին, որ հայրենի հողը ոտնակոխ լինի, որից հետո սկսվեց պետականաշինության շատ ավելի բարդ գործընթացը:

Եվ մենք անկախության տարիներին տեսանք բազմաթիվ հիասթափություներ, տեսանք արտագաղթ, տեսանք տնտեսական և քաղաքական դժվարություններ, տեսանք բավականին տխուր ընթացք, երբ եկավ մի ժամանակ, երբ գրեթե ամեն օր մամուլում հարց էր հնչում, թե ինչպիսին կլինեն արդյունքները եթե այսօր, այսինքն 1991 թվականից 5 տարի անց, 10 տարի անց, 15 տարի անց, 20 տարի անց լիներ անկախության հանրաքվե:

Իհարկե, ես միշտ համոզված եմ եղել, որ բոլոր ժամանակներում, երբ էլ տեղի ունենար անկախության հանրաքվեն՝ մեր ժողովուրդը միասնական «Այո» կասեր անկախությանը: Ես երբեք դրանում չեմ կասկածել, բայց պետք է արձանագրեմ, որ նաև այս ընթացքում շատ կասկածողներ են եղել և ի վերջո նաև տրվել է այս հարցի պատասխանը, որովհետև ես համարում եմ, որ 2018 թվականի ապրիլ-մայիսին, Հայաստանի Հանրապետությունում տեղի ունեցավ անկախության մի նոր հանրաքվե և հարյուրհազարավոր այն քաղաքացիները, ովքեր դուրս եկան հրապարակ, դուրս եկան փողոցներ Հայաստանի Հանրապետությունում և Սփյուռքում՝ նրանք դուրս եկան նույնքան բարձր, նույնքան վճռական, նույնքան հաստատակամ «Այո» ասելու Հայաստանի Հանրապետության անկախությանը:

Դա անկախության մի նոր հանրաքվե էր, որն ասաց, որ հայ ժողովուրդը 28 տարվա, 27 տարվա ընթացքում, ոչ միայն չի մաշեցրել անկախ պետականություն, ինքնիշխանություն, ժողովրդավարություն ունենալու իր կամքը, այլև այս ողջ ընթացքում դարձել է ավելի հաստատակամ, ավելի վճռական, ավելի ուժեղ և ավելի ամուր է կանգնած իր ոտքերի վրա:

Եվ ուրեմն այսօր սեպտեմբերի 21-ն է, 28 տարվա սեպտեմբերի 21 և մենք հավաքվել ենք ահա այստեղ ևս մեկ անգամ արձանագրելու, որ Հայաստանի անկախ պետությունը երկիր մոլորակի վրա այլևս գոյություն է ունենալու հավիտյան և հայ ժողովուրդը, որպես մի մեծ հավաքականություն՝ ունի բավարար կամք, ունի բավարար իմաստություն, ունի բավարար գիտելիք, ունի բավարար տաղանդ և ունի բավարար վճռականություն իր ուսերին կերտելու, իր ուսերին տանելու պետականության պատասխանատվությունը և ապրելու ազատ և երջանիկ այդ պետականության մեջ՝ որպես ազատ երկրի հպարտ քաղաքացի:

Եվ ուրեմն, կեցցե՛ ազատությունը, կեցցե՛ Հայաստանի Հանրապետությունը, կեցցե՛ Արցախի Հանրապետությունը, կեցցե՛նք մենք և մեր երեխաները, որ ապրում ենք ու ապրելու ենք ազատ և երջանիկ Հայաստանում: Կեցցե՛ն մեր թոռները, կեցցե՛ն մեր ծոռները, կեցցե՛ն մեր թոռների և ծոռների թոռները և ծոռները, ովքեր ապրելու են ազատ, երջանիկ, հզոր, անկոտրում ու հաղթանակած Հայաստանում»: