Վարչապետի պաշտոնակատար Նիկոլ Փաշինյանն այսօր կառավարությունում հյուրընկալել է ծանրամարտի և ազատ ոճի ըմբշամարտի Հայաստանի հավաքականների անդամներին՝ հավաքականների մարզիչների գլխավորությամբ:

Հանդիպմանը մասնակցում էին ծանրամարտի Հայաստանի հավաքականի գլխավոր մարզիչ Փաշիկ Ալավերդյանը, մարզիչ Վիգեն Խաչատրյանը, Օլիմպիական խաղերի արծաթե մեդալակիր, աշխարհի և Եվրոպայի բազմակի չեմպիոն Սիմոն Մարտիրոսյանը, Օլիմպիական խաղերի արծաթե մեդալակիր, աշխարհի և Եվրոպայի բազմակի մրցանակակիր Գոռ Մինասյանը, աշխարհի ու Եվրոպայի չեմպիոն Հակոբ Մկրտչյանը, Եվրոպայի չեմպիոն Անդրանիկ Կարապետյանը, Եվրոպայի չեմպիոններ Կարեն Ավագյանը և Սամվել Գասպարյանը, արծաթե մեդալակիր Արսեն Մարտիրոսյանը, բրոնզե մեդալակիրներ Վարազդատ Լալայանը և Լիանա Գյուրջյանը, հավաքականի բժիշկ Դավիթ Մոսինյանը, ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանը, մարզիչ Էդգար Ենոքյանը, վարկանիշային մրցաշարերի հաղթողներ՝ աշխարհի գավաթի անհատական խաղարկության հաղթող Վազգեն Թևանյանը և Եվրոպայի չեմպիոն Արսեն Հարությունյանը: Ներկա էին նաև Կրթության, գիտության, մշակույթի և սպորտի նախարարի պաշտոնակատար Վահրամ Դումանյանը, ԿԳՄՍ փոխնախարար Կարեն Գիլոյանը, Ն. Փաշինյանի գլխավոր խորհրդական Արայիկ Հարությունյանը, պաշտոնատար այլ անձինք:

Ողջույնի իր խոսքում Նիկոլ Փաշինյանը նշել է.

«Ծանրամարտի Հայաստանի հավաքականի հարգելի մարզիչ,

Ազատ ոճի ըմբշամարտի Հայաստանի հավաքականի հարգելի մարզիչ,

Հարգելի մարզիկներ,

Հարգելի գործընկերներ,

ուրախ եմ ձեզ ողջունելու համար: Ուզում եմ ընդգծել, որ այսօր ոչ այնքան հրավիրել եմ ձեզ շնորհավորելու, որքան շնորհակալություն հայտնելու հաջող մրցելույթների համար, որովհետև կարծում եմ, որ հատկապես այս ժամանակաշրջանում այն հաղթանակները, հաղթանակի այն զգացողությունը, որ դուք պատճառեցիք մեզ բոլորիս, Հայաստանի ժողովրդին, կրկնակի ավելի կարևոր և կրկնակի մեծ արժեք ունեն, որովհետև հետպատերազմական այս շրջանում վստահությունը սեփական ուժերի նկատմամբ շատ կարևոր է, և ձեր հաղթանակներով, կարծում եմ, շատ էական դերակատարում ունեք:

Ընդհանրապես սպորտը սեփական ուժերի նկատմամբ ժողովրդի, պետության վստահության շատ կարևոր վկայություն է և շատ կարևոր է ազգի, ժողովրդի տաղանդը և հնարավորությունները բացահայտելու համար, որովհետև, համոզված եմ՝ ձեր օրինակով բազմաթիվ մարդիկ ոգևորվում են: Պարտադիր չէ, որ ոգևորվեն հատկապես ծանրամարտիկ կամ ըմբիշ կամ այլ մարզիկ լինելու համար, այլ ուղղակի, կարող է դրանից ինչ-որ մեկը ոգևորվի, ինժեներ դառնալու իր երազանքի նկատմամբ ավելի մեծ հավատ ունենա և այդպես շարունակ:

Կարծում եմ՝ ընդհանրապես սպորտը, հաղթանակները, կամ հաջողությունները և անհաջողություններն արտահայտում են այն խորքային պրոցեսները, որոնք երկրում տեղի են ունենում: Այս առումով մենք մեր բոլոր ռազմավարություններում սպորտին շատ մեծ ուշադրություն ենք դարձնում: Նույնիսկ մինչև 2050 թվականի Հայաստանի վերափոխման ռազմավարություն ենք ընդունել, որտեղ խնդիր ենք դրել, որ մինչև 2050 թվականը Հայաստանը պետք է ունենա առնվազն 25 ոսկե օլիմպիական մեդալ, Հայաստանի ֆուտբոլի ազգային հավաքականը պետք է դառնա Եվրոպայի կամ աշխարհի առաջնության մեդալակիր: Կարևոր է այս նշաձողերը դնել և այսօրվանից աշխատել այդ նշաձողերը հաղթահարելու համար: Իհարկե, մենք հասկանում ենք, որ սրա համար էական է սպորտի ֆինանսավորումը, մարզական ենթակառուցվածքների ձևավորումը և մի քանի նախագծեր արդեն իսկ իրականացնում ենք:

Տեսեք, այսօր մենք, օրինակ, ի՞նչ պրոբլեմ ունենք. մեր դպրոցների մի հսկայական մասում մարզական ենթակառուցվածքներ չկան, այսինքն՝ ֆիզկուլտուրայի դասեր անելու պրիմիտիվ պայմաններ չկան: Մեր բարձրագույն ուսումնական հաստատություններում մարզական ենթակառուցվածքներ չկան: Օրինակ, մենք խոսում ենք օլիմպիական շարժման և հաջողության մասին, բայց ամբողջ աշխարհում օլիմպիական շարժման ամենակարևոր սեգմենտներից մեկն ուսանողական սպորտն է: Հայաստանում, ցավոք, ուսանողական սպորտը շատ լուրջ պրոբլեմներ ունի, հենց թեկուզ ենթակառուցվածքների բացակայության պատճառով: Երբ մենք շատ դեպքերում տեսնում ենք, թե աշխարհի կամ օլիմպիական խաղերի մեր չեմպիոններն ինչ պայմաններում են պարապում, մենք ընդհանրապես ասում ենք՝ լավ, ինչպե՞ս է դա հնարավոր, որ այսպիսի պայմաններում մարդը կարողանում է դառնալ Եվրոպայի, աշխարհի, օլիմպիական խաղերի չեմպիոն: Սա ի՞նչ է նշանակում: Սա նշանակում է, որ եթե այս պայմաններում այս հաջողությունները մենք ունենք, եթե մեր ենթակառուցվածքները, ֆինանսավորումը և մնացած պայմաններն այլ լինեն, մենք, իսկապես այն, ինչ ասում ենք՝ 25 օլիմպիական մեդալ, այդ դեպքում ո՛չ կասկած, ո՛չ էլ ժպիտ կհարուցի, այսինքն՝ դա կլինի խնդիր, որը բոլորս կհամարենք լուծելի:

Ամեն դեպքում, ևս մեկ անգամ ուզում եմ ձեզ շնորհակալություն հայտնել: Ուզում եմ ասել, որ նաև մեր ծանրամարտիկների ելույթներին հետևել եմ հեռուստատեսությամբ, սրտի դողով: Ազատ ոճի ըմբիշների ելույթներին երեկ չեմ հասցրել հետևել, բայց լրատվությանը հետևել եմ: Փաստորեն թիմային հաշվարկում Ծանրամարտի մեր հավաքականը երկրորդ տեղը գրավեց՝ 2 ոսկե, 2 արծաթ և 4 բրոնզ: Եվ մեր ազատ ոճի ըմբիշները վարկանիշային մրցաշարում հաղթել են, և 2 օլիմպիական ուղեգիր ունենք:

Իհարկե, շնորհավորանքից և շնորհակալությունից բացի, կուզենայի նաև քննարկենք, թե ինչ հրատապ անելիքներ ունենք, որպեսզի առավել պատրաստված մոտենանք օլիմպիական խաղերին, որովհետև, բնականաբար, բոլորս մեծ սպասումներ ունենք: Գիտեմ՝ շատ դեպքերում, ցավոք, ամենալավը չեն այն պայմանները, որոնցում դուք մարզվում եք: Առավել ևս ձեր հաջողությունները գնահատելի են, բայց նաև ուզում եմ ասել, որ մենք մարզական ենթակառուցվածքների մասով շատ լուրջ աշխատանք ենք իրականացնում: Հիմա առնվազն 2 նախագիծ ունենք, երբ մեր նշանավոր և հաջողությունների հասած մարզիկների անուններով արդեն մարզադպրոցներ ենք ստեղծում՝ Գյումրիում Արթուր Ալեքսանյանի անվան մարզադպրոցը և Սիմոն Մարտիրոսյանի անվան մարզադպրոցի նախագիծն արդեն պատրաստ է: Եվ մենք, այո, պետք է պայմանով սկսենք մրցույթ անել, թող շահի, հետո արդեն ֆինանսավորումը կբացենք: Ջրառատում է կառուցվելու դպրոցը: Հույս ունեմ, որ բոլորիդ անուններով դպրոցներ կառուցելու առիթ կունենանք, օլիմպիական մեդալներ նույնպես կնվաճեք և մեր ռազմավարական խնդիրները կլուծենք»:

Ծանրամարտի և ազատ ոճի ըմբշամարտի Հայաստանի հավաքականների ներկայացուցիչները կարևորել են նման ձևաչափով հանդիպումները՝ ձեռքբերումները գնահատելու, առկա խնդիրները վերհանելու և արդյունավետ լուծումները համատեղ քննարկելու տեսանկյունից:

Ընդգծելով, որ թե՛ պետությունը, թե՛ հասարակությունը բարձր են գնահատում հայ մարզիկների հաջողությունները միջազգային մրցաշարերում՝ վարչապետի պաշտոնակատարը հետաքրքրվել է առկա խնդիրներով՝ դրանց արագ լուծում տալու և այս տարի Տոկիոյում կայանալիք օլիմպիական խաղերին հավուր պատշաճի պատրաստվելու համար:

Շոշափվել են, մասնավորապես, մարզական ենթակառուցվածքների բարելավմանը, անհրաժեշտ մարզագույքի, մարզավիճակի պահպանման համար պահանջվող դեղորայքի ձեռքբերմանը, այդ նպատակով գնումների գործընթացը մեկ անձից գնման ընթացակարգով արագ կազմակերպելուն, ինչպես նաև օլիմպիական խաղերին մասնակցող մարզիկների համար սահմանված նպաստների չափաքանակի ավելացմանը, սպորտային ավանի կառուցմանը վերաբերող և այլ հարցեր:

Նիկոլ Փաշինյանը հանձնարարել է պատասխանատուներին՝ քննարկման արդյունքներով մշակել և հաստատման ներկայացնել որոշումների նախագծեր: